Rogstaekers Aod Preense Plevuûze Paad

De “Rogstaekers Aod Preense Plevuûze Paad” és vuuërâl ‘n educatief project. ‘T és ‘n initiatief van de Aod Preense Club en gecoördinieërdj doeër Marktplaats Ku+Cu, verbeenger van oongerwiês en cultuur. Ongevieër 600 schoeëlwichter hebbe aan t project mejgedaon mer ouch minse van Atelier 88 van de stichting Pedagogisch Sociaal Wêrk Midden-Limburg. Ze hebbe vör zoeën 70 plevuûze ‘n hieël dael ontwêrpe gemaaktj.

‘T doel van ‘t initiatief és wichter te betrékke beej de volkscultuur en t fíeëst van Vastelaovendj en ‘t stimulieëre van de kennis oeëver de oeërsprong van dit cultuurfieëst . Zoeë gaeve de Aod-Preense ‘t fieëst van vastelaovendj, woeë zeej zelf einmalig ‘n aantal waeke leiding aan goove, trök aan de wichter en weurtj de cirkel roond.

De Aod-Preense vertélle in de schoeëlklasse oeëver vastelaovendj en ‘t “preens zeen” en tiêdes ‘n interactief gesprek kunne de wichter de Aod-Preense volop vraoge stélle. Verder bestieët ‘t project uut ‘n les op schoeël met korte filmpkes oeëver vaste en vastelaovendj en weurtj ‘n bezeuk gebrachtj aan ‘t Rogstaekers archief. Oonger begeleiding van unne vakdocênt van Rick (Regionaal Instituut voor Cultuur- en Keunsteducatie) gaon de wichter daonao aan de slaag met ‘t ontwêrpe van de plevuûze. Eedere lieërling maaktj ‘n eige ontwêrp vör de plevuus van ‘eure’ Aod-Preens, woeëbeej ouch ‘t logo, jaortâl en de name van de Rogstaekerspreens en -jeugdpreens in ‘t ontwêrp waere verwêrktj. ‘N deskundige jury bepaoltj waat vör ontwêrp uuteindelik weurtj uutgeveurdj. De plevuûze waere gemaaktj in cortenstaol, woeëin ‘t ontwêrp weurtj uutgesnieëje.

De “Plevuûze Paad” vormtj neet eenkel unne duik in waat gewaesj és, mer is ouch oppe toekomst gerichtj. De plevuûze herinnere neet allén aan Aod-Preense uut vervloeëge ti-je mer ouch aan de preense van ‘t aafgeloupe jaor. Eeder jaor keumptj d’r unne nowwe Rogstaekers(jeugd)preens en dus ouch unne nowwe plevuus beej. ‘T educatief project keumptj zoeë eeder jaor trök beej zoeëwaal de schoeëlwichter as in de hieël stad Wieërt. De nowste plevuus weurtj jaorliks onthuldj op de Aod-Preensedaag, ongevieër ‘n waek vuuër vastelaovendj, doeër allebéj de Aod-Preense same met de ontwêrp(st)er.

De officieël start van ‘t project waas op 11 november 2011. In fibberwari 2013 és de ieërste plevuus van de aodste stadspreens Guille I (1937) onthuldj vuuër ‘t Aod Preense Peliês (Sociëteit Amicitia) aan de Mêrrentj.  In juni 2013 és “de Plevuûze Paad” officieel in gebroeëk genoeëme. Beej di-j gelegenheid presentieërdje Ton Wolter ‘t doeër hem geschrieëve Plevuûze Paad-lidje.

Samewêrking

’T schoeëleproject és ‘n initiatief woeërbeej de Aod-Rogstaekerspreense samewêrke met Rick, de gemeindje Wieërt, Atelier 88 en ‘t basisoongerwiês in Wieërt. ‘T project és gecoördinieërdj doeër Marktplaats Ku+Cu, verbeenger van oongerwiês en cultuur.

‘T initiatief és tot stând gekaome met hölp van de Provincie Limburg en ‘t Fôns vör Cultuurparticipatie, Gemeindje Wieërt, wuuëningcorporatie Woeëne Limburg, Marktplaats Ku+Cu, Stichting Jo Bergmans, de Wieërter basisschoeële, stadsvastelaovendjvereiniging de Rogstaekers  en de Rogstaekers Aod Preense Club.

This post is also available in: Dutch