Ongerscheî-jinge zeen altiêd in trêk gewaesj. Ongerscheî-jinge zoeë as de Orde van Oranje Nassau en Penning van Verdeenste vanne stad Wieërt waere beschawdj as ‘n ieër vör bewieëze deenste. Vreuger woeërte ongerscheî-jinge uutgereiktj mét de bedoeling de persoeën aan uch te bînge. Um daomej d’n draak te staeke woeërte vastelaovendj- ongerscheî-jinge ingestéldj. Di-j ongerscheî-jinge woeërte doeër ‘ne naomaak-preens midde tösse de ongerdane gegoesj. Dit rituieël bestieët neet mieër.

Graaf Adolf I van Kleef van Duitslând woor ‘n echte fieëstnaas en inne vastelaovendjtiêd krieëg hae de kôlder inne kop en kwoom mét e knettergek idee. Hae neumdje zich preens en maakdje zien adelike vreendje minister of lid vanne Raod. Det waas eigenlik spotte. Ouch kwoom d’r ‘n ongerscheî-jing “de Orde der Gecken”. Zien vuuërbieëldj vong oeëverâl in Duitslând naovôlging. Oeëverâl kwoom ‘ne Raod van Elf en preense en d’r woeërte optochte georganizieërdj. De ongerscheî-jinge woeërte mét hangvôl uutgereiktj en edereîn dae rap oppe bein woor, droog ‘n medâlie gruuëts op ziene boêk.

Det kunne ve noow wul vergaete. ‘t Goeze mét ongerscheî-jinge det gebuuërtj neet mieër                                           Edereîn dae ’n vastelaovendj-ongerscheî-jing kriegtj mot dao groeëte verdeenste vör hebbe, ‘t zeen gein ‘wégwêrpartikele’ mieër. Ze zeen zelfs deur en zeen neet allemaol bestumdj vör ‘t gewoeën vôlk. D’r weurtj groeëte waerde gehechtj aan dieës medâlies en ‘t beteîkentj ouch det edereîn op jas of boêk kân zeen det ze beej ‘t vastelaovendjgebuuëre zeen betrokke. Ouch Limburg hieët bezûndjer exemplare, zoeë as de Gouwe Narrekap en de Gulden Humor.

De Rogstaekers

As officieel stadsvastelaovendjvereîniging kriegtj de preens vanne Rogstaekers vuuër de vastelaovendjtiêd as einige in ‘t stadhoês de sluuëtel vanne stad uutgereiktj. De vereîniging hieët de Hoêsorde vanne Rog. Ge motj echt waal wat prestieëre um di-j te kriêge. Nog meujliker és ‘t um de Orde vanne Rog te kriêge mét de volgendje gradaties: “Ridder inne orde vanne Rog”, “Offeseer inne orde vanne Rog”, vervôlges “Groeëtoffeseer inne orde vanne Rog” en tot slot “Commandeur inne orde vanne Rog”. As dejje mét di-j daag emes tieëgekomtj mét zoeë ‘n medâlie op ziene boêk dan mojje wieëte det ‘t emes és mét e groeët hert vör de vastelaovendj vanne Rogstaekers.

Ouch edere stadspreens enne jeugdpreens hebbe eur eîge ongerscheî-jinge. Ouch dao weurtj beslisj neet mieër mej gegoesj. ‘t Aantal uut te reike ongerscheî-jinge blieftj allewiel bepêrktj tot ongevieër 300. Det és neet völ! Ze motte dan ouch echt verdeendj waere.

This post is also available in: Dutch

0 replies

Leave a Reply

Want to join the discussion?
Feel free to contribute!

Leave a Reply

Your email address will not be published. Required fields are marked *