Berichten

80e Rogstaekerspreens 2026: Henk III

In 2026 gieët Henk Coenen de Wieërter vastelaovendj vuuër as 80e Stadspreens van Wieërt.
In heur 100e vastelaovendjsezoen hieët Stadsvastelaovendjvereîniging de Rogstaekers gekoeëze vör ‘ne vuuërgaenger met völ laeveservaring. Aan ‘t indj van de mieër as geslaagdje Gala Boonte Aovendj woeërt de 64-jaorige laevesgeneêter geïnstallieërdj as Stadspreens van Wieërt.

As zoeën van Piet Coenen, dae in 1948 Adjudânt beej Preense Leike I de Borgie woor, en Lies Cramers, eîn van de maegtjes van Cramers-van Asten, és de nowwe Preens geboeëre en getoeëge aanne Sint Antoniusstraot in de Heiligebuurt. Same met twieë breurs en ‘n zöster gruudje hae op in ‘t hoês woeë hae noow woeëntj met zien echtgenoeëte Elian Beelen, ‘n dochter van Piet Beelen en Truus Jacobs.

Zeuj zeen de gruuëtse aojers van twieë prachtige dochters.
Vera, woeëmej de nowwe Preens in oktoeëber de marathon van Amsterdam geloupe hieët, woeëntj same met Nick. Tessa woeëntj same met Bart en di-j twieë hebbe in september Henk III en Elian de gruuëtse opa en oma van Liam gemaaktj.

Nao jaore wêrkzaam te zeen gewaesj beej Philips en de aafsplitsing NXP semiconductors és de nowwe Hoeëgheid in november vuuërig jaor gestoptj met wêrke. Um neet hieëlemaol in ‘n gaat te valle deut hae nog ángerhâlve daag per waek adveêswêrkzaamhede.

Vervaele hooftj de Preens zich zoeëwi-jzoeë neet! Hae és waekeliks te vînge beej sportschoeël Primal en moog gaer ’n bélke hawwe beej Crossmoor. Wieter hultj Henk III van lange aafstânde renne en verre reize make. Daonaeve és hae actief vör de cliënteraod Hornehoof en spuuëltj hae euphonium (kleine tuba) beej de 3×11 jaor jubilieërendje kepél Gootgemootj, woeë hae ouch amateur-vuuërzitter van és. Naeve meziek make organisieërtj dieës kepél eder jaor ónger ângere de ‘verzörgdje middig’ in verschillendje verzörgingstehoêze. Wieter és de Preens eîn vanne initiatiefnemers van ‘Hermeniekes on Tour’.

Normaal gieët hae met vastelaovendj uutbundig verkleîdj en geschmînktj op stap, mer as telg van Cramers-van Asten zitj dit nette Preensepak ‘m neteurlik ouch wi-j gegoeëte.

As muzikânt hieët Stadspreens Henk III gekoeëze vör de ‘Orde vanne Vâlse Noeët’.

Same met zien echtgenoeëte Elian, zien Adjudânte Bert van Dijk, met Marlies Jansen, Hugo Lammers, met echtgenoeëte Helma en Wim de Borgie, met echtgenoeëte Ine, gieët Stadspreens Henk III de Wieërter Vastelaovendj vuuër ónger zien devies:

Dînktj waat dejjae dînktj.
Doôtj waat dejjae doôtj.
GOOTGEMOOTJ!

Foto’s: Naomi Knoppers | Studio Blitz

Kammeräödje 2026: Aod Preens Godain I

Op zaoterdig 29 november woeërt Godain Weerts doeër Vorst Jasper, Kanseleer Roland en Kommissaris Emiel verrásj met de tówkinning vanne Orde van ‘t Kammeräödje.

’t ‘Kammeräödje’ és ‘n speciaal óngerscheiding van Stadsvastelaovendjvereîniging de Rogstaekers di-j huuëgstes eine kieër per jaor wurtj uutgereiktj aan ‘ne persoeën of groep dae zich op ‘n bezûndjer meneer en vörâl oppe achtergrónd verdeênstelik hieët gemaaktj vör de Wieërter vastelaovendj in ‘t algemein en De Rogstaekers in ‘t bezûndjer.

Godain és nao zieën Preensschap in 2013 actief gewoeëre as vreejwilliger inne sponsorkemissie vanne Rogstaekers. Ruum 11 jaor hieët hae zich ingezatte vör ’t wêrve van stiêpels en ’t ongerhaoje van relaties met bedriêve, zodét de Wieërter Vastelaovendj financieel ongerstuuëndj kos waere.

Vae zeen hem dao zieër erkintelik vör. Wieter deut Godain al jaore mej in de Groeëte Optocht mét de vereîniging “Di-j van os en vae” en és hae ‘ne enthousiaste vastelaovendjveerder. Daorum és Godain beneumdj tot Kammeräödje vanne Rogstaekers 2026.

UPDATE:

Tiêdes de première Boonte Aovendj van donderdig 15 jannewarie és de óngerschei-jing uutgereiktj aan Godain.

In zien towspraak referieërdje Vorst Jasper aan ’t preensschap van Godain, dae in 2013 regieërdje ónger ’t devies “Hivoplmedida”, waat zoeëvöl woeëj zégke as “Hieël völ plezeer mét di-j daag”. De Vorst beânkdje Godain mét ’n aeve cryptische lettercombinatie. Woeënao Godain de microfoon oeëvernoeëm: “Ich zal ’t kort haoje: DHNG!”. Woeë-op edereîn zich aafvroeëg, waat det in hieëmelsnaam weer kós beteîkene. Zien ântwoeërd: “Det haaj neet gehoôve!”

Stadspreens 2025: Stefan II Wolter

79e Stadspreens van Wieërt: Stefan Wolter

In 2025 zingtj Stefan Wolter as Stadspreens Stefan II vanne Rogstaekers ’t hoeëgste leêd tiêdes de vastelaovendj.

Traditiegetraw woeërt de nowwe Stadspreens uutgeroope aan ’t indj van de vernówdje en mieër as  geslaagdje Gala Boonte Aovendj. Nao ‘n sketch vôl humor en meziek blieëk de 34-jaorige rasartiest en vastelaovendjveerder pur sang de nowwe vuuërgaenger vanne Wieërter vastelaovendj te zeen.

As zoeën van Jack van Twan en Toos Wolter en Lysanne van Jacques en Thea Roost vanne Stroêjscheur in Ni-jwieërt woeërt ‘m de vastelaovendj al as wécht mejgegaeve. Opa en oma Wolter woeëndje vreuger inne Wilhelminastraot dus woeërt, same met zösterkes Sanne en Daphne, de Groeëte Rogstaekersoptocht oppe Driesveldlaan bekieëke. Heej schoeët de kleine Stefan as cowboy of indiaan met z’n pertungskes oppe daelnemers. Later deej Stefan, same met de vettigste vereiniging van Wieërt, V.V. Vétkej, mej aan meînig optocht.

De nowwe Preens van Wieërt és getrawdj met Iryn Janssen, ‘n echt ‘Meerminneke’ uut Zuuëmere. De wichter James van bekans 4 jaor en de twieëling Lennon en Charlie van bekans 2 jaor zörge, same met de uutbundjige Stefan, vör ‘ne laevendje boel in hoêze Wolter aane goojekoupe kânt vanne Kazernelaan.

In ‘t dageliks laeve guftj Preens Stefan II les oppe groeëte-minse-schoeël in Indjevve, de Fontys University of Applied Science, daomej drék verwiêzendj nao ‘t feit det hae és opgelédj as docênt Îngels, want eigelik ésj gewoeën Fontys Hogeschool. In zieëne spaarzame vreeje tiêd traintj de Hoeëgheid z’n aod volleybalteam Stravoc-VC Weert Hieëre 1 en moog hae gaer optraeje as zênger of prizzentator. Dét léste keumtj nao vuuër in zien

‘Orde vanne Zîngendje Zwetser’

Now beej De Rogstaekers és det de Stadspreens al beej zien uutrooping zien adjudânte kos prizzentieëre. As ‘Sirremoniemeister’ zâl Rick Arts (getrawdj met Chantal) optraeje, de ‘Ordebewaarder’ és Martijn van Buggenum (getrawdj met Sanne) en Joost Verheijden (met vrîndin Kimmy) és de ‘Klei-jermeister’. ‘Schatbewaarder’ Brent Verschuuren (met vrîndin Sofie) maaktj ‘t kabinet vanne Preens complieët.

Op zaoterdig 1 mieërt zâl Stadspreens Stefan II op ‘t Stadhuis de Stadssluuëtel in háng kriêge. Daomej kriegtj hae vör drej daag de Macht oeëver Wieërt en zâl hae de vastelaovendj 2025 vuuërgaon ónger zien devies:

Dit és zoeë schoeën, baeter gaon vae ’t neet kriêge!

Rogstaekerspreens 2024: Ruud I uutgeroope

In 2024 guftj Ruud Teunissen as Stadspreens Ruud I vanne Rogstaekers kluuër aan de Wieërter vastelaovendj.

Ruud és de zoeën van Frans Teunissen en Annelies Kuijpers en ‘ne kleînzoeën van Daan Tuuënisse vanne Binnemuuële aane Wilhelminasingel. Hae és 50 jaor gelieëje geboeëre in ’t Sint Jans Gasthoês aane Voeëgelsbleîk. Völ minse zulle ’t hoêshaoje Teunissen kinne vanne “Koffieshop ‘t Trefpunt” inne Mûnt, tieëgenoeëver de Albert Heijn.

Jaorelânk woeër Ruud e bekindj gezicht inne horeca van Wieërt en daoboete, tot e jaor of drej gelieëje Corona root in ’t aete goêzje. Gelökkig és hae vlot genógt kunne beginne as wêrkbegeleider beej De Risse. Heej és plaats vör völ minse di-j êrges ângers lastig aane bak kaome. Dét oeëze Hoeëgheid gaer wêrktj met minse, ’t leêfst zoeë verschillendj muuëgelik, keumtj dus good uut!

(foto’s: FLITZER! fotografeert)

As lid van ‘VV de Kuiters’ sleîpdje pap en mam de kleine Ruud en zus Renate al oeëverâl mej naotow. Inne buggy met ’n groeëte pruûk en de snoeët vôl schmink woorte de wichter al besmétj met ’t heerlikke vastelaovendjvirus. As opgrujjende jóng woort de Hoeëgheid lid van ‘VV de Ketsers’ en woeër hae as wagebawwer actief beej ‘VV de Flabusse’. Dus de Groeëte Rogstaekersoptocht és al bekindj terrein.
Met de ‘Kloeëtmejoeërs’ woort meînig fieëst bezochtj en wi-j in 1998 Noël I Seerden vanuut dieës club de Wieërter vastelaovendj vuuër ging woor Ruud eîn van zien gruuëtse Adjudânte.
Dét vastelaovendjsezoen woor extra bezûndjer want tiêdes ’t Boorebâl woort hae vör eine aovendj inne onecht verbónge met Boorebroêd Wendy Driessens. Dao bleêf ’t beej vör waat betreftj relaties met vrölluj.

Jaorelânk hieët oeëze vuuërgânger oppe bühn vanne Boonte Aovendje gestânge met de ‘Vastelaovendjzêngers’ en allewiel és hae achter de schêrme actief as grimeur en bösseltj hae mette klei-jer.
Zînge deût hae nog regelmaotig beej Fieëstband Dial24 en as hae, al kui-jerendj, óngerwieëges és met e meziekske op z’ne kop.
Wieter stieët hae nog ’s gaer inne kuuëke. Thoês of beej bevrîndje cateraars, want ’t bloôd kruuëptj woeë ’t neet gaon kân. Mer ’t allerleêfst pôngeltj oeëze Preens wat met vêrf of schmink. Oppe moor, ‘ne raam of ’n schoeën snoeët.

Ziêne Dorstlustige Hoeëgheid hieët de ‘Orde vanne Boonte Muuële’ ingestéldj.
De muuële kûmtj neteurlik van de bakkeri-j van opa, di-j de ‘Binnemuuële’ hédje en ’t boont keumtj vanne alle kluuëre vanne raengelboeëg, umdet ederein in oeëze gewêldjige vastelaovendj mej moôg drejje!

Same met zien Adjudânte Marc Beelen, Frank Driessen en Roy Truijen zâl Preens Ruud I de Wieërter vastelaovendj kluuër gaeve ónger zien devies:

Vastelaovendj vör ederein,
dao drejtj ’t um!